ايدي و ماسكه الريشة بترسم
لكن جوه ضلوعي, و عقلي حكاية شاغلاني

بين الايد و العقل الرسم اتقسم؟؟
ولا بعد رسم الايد, العقل بيرسم تاني!!

برسم

برسم فوق النسمة بريشة ,,,,, تنطر لون على طول يتمد
برسم قهوة و طاولة و شيشة ,,,,, فوقهم بيت على طول يتهد
ابدأ ارسم نهر طويل ,,,,, يبدأ مجرى قوام يتسد
ارسم نكتة و ضحكة خفيفة ,,,,, تطلع باردة و جد الجد
ليه العمر الساير... باير؟ ,,,,, ليه الدنيا متديش حد
ليه الحب يقابله خساير؟ ,,,,, ليه القرب يساوي البعد
ليه الواحد ينبح صوته ,,,,, ينادي ع الخير و ما يلقاش رد
ليه المصري في عز سكوته ,,,,, بيلقى مشاكل ملهاش حد
يسمع دايما بالتغيير ,,,,, و التعديل, ولا شيء جد
نور الضلمة يغيم فوقنا ,,,,, قوم نستنى النور في الغد
ييجي الغد و برضة مضلم ,,,,, واحد منا يقوم يحتد
تلقى الشمس تقوله تعالى ,,,,, ورايا و ماتوريهشي لحد
او يتعدل واما يشوف الضلمة ,,,,, بسرعة يبوس اليد
و يقول ضلمة و وسط عيالي ,,,,, احسن قوي من ضلمة البعد
انا مش عارف ليه البيت اتهد ,,,,, و ليه النهر اتسد
بالتأكيد فيه حاجة غريبة ,,,,, أيوا دي حاجة غريبه بجد
لو على هد البيت حتقوللي ,,,,, الخامة ولا الزلزال شد
طيب ليه النهر يا حلو ,,,,, رغم القوة قوام اتسد!!!

كلمتين في حب مصر

سألوني بحب مصر؟ أنا قلت مين غيرها
فيها الحصير و القصر
حاويين بذور خيرها
و النكتة فيها.. تنقال
و الضحكة فيها.. موال
ولا عشان المال نشفان من بيرها.. تقوللي بحب مصر
طبعا و مين غيرها
***
دة طينها ويا النيل.. مستنيين بذرة
يرميها أي عويل
تطلعلنا شجرة
منها نشوف الخير
منها نشوف محاصيل.. تضوي.. يبان ليلها
وتقوللي بحب مصر
طبعا و مين غيرها
***
بكتبلها أشعار.. بالمصري تتلحن
زي الفطير ع النار.. لما بيتسخن
تطلعلنا غنوة
و لمصر نشديها
و يقول: تغني لمصر بعد اللي بان منها
هاتولي أي حتة تانيه أغنيلها
وتقوللي بحب مصر
طبعا و مين غيرها
***
يعني عشان بلدي.. عصابة ماسكينها
مش أربعين.. لأه.. اضرب في عشرينها
فاكرينها المغارة.. و الشعب علي بابا
لازم يوت كله.. مانسيبشي فيه هبابة
أقوم بروح جاحدة
أنكر كرم طينها
وانكر جمال ليلها
وانكر عسل نيلها
وتقوللي بحب مصر.. راح اقوم و اغنيلها
والله مافيش غيرها.. والله مافيش غيرها

عيد ميلاد نورا

الليلة عيد....ولا بلاش ,,,,, الدين يقول ماتعيدوهاش
معلش أصل دي فرحة اتش ,,,,, ف الليلة ديا ماتحسبوهاش
يوم نورا لما جت ع الأرض ,,,,, ملفوفة كدهه ف لفة قماش
الشمس حلفت والله ما حطلع ,,,,, من بعد نورا أنا ع المعاش

اسكندريه

الصبح زحمة و الظهر حر

و سحابة سودا فوق جو مصر

و العصر زهمه و المغربية

يا مين ياخدني ع اسكندرية

****

في اسكندرية تشوف النجوم

و الناس بتمشي من غير هدوم

و العيشه ملبن و مهلبية

يا مين ياخدني ع اسكندرية

فقر الجهل والجوع

يا فقر فيك عايشين صابرين ,,,,,, و نقول منين تيجي الملايين
والحب كفي قلوب عاشقين ,,,,,, عايزين يعيشو و مش لاقيين
و الظلم واقع عالمساكين ,,,,,, والعدل جاي لو بعد حين
والفرح زاد في عيون ظالمين ,,,,,, م السرقه من أكل المساكين
والجرح زاد برضه يا معين,,,,,,في قلوب تعيش و تموت ساكتين
ساكتين على الجوع و الظالمين,,,,,,ساكتين على حقوقهم ضايعين
عايشين في غابه و مش عارفين,,,,,,عايشين في خرابه ولا فاهمين
واهي زيطه زايطه و ناس زايطين,,,,واهي دوشه تدوش السامعين
فات عمر شعب على السارقين ,,,,,, ولامتا راح نفضل ساكتين
ماهو بعد ماعرفنا الظالمين ,,,,,, ماعدش باقي ليهم ولا عين
حنقوم نخلص تار الطين ,,,,,, طين مصر ياللي عليك العين
م المبتدا لنهاية الكون

جميل جميل جميل

بعدك يا عمر طويل
م الحرقة والمواويل
حسيت بحب جميل
جميل جميل جميل
اكتر م الاكل يا جعان
اكتر م المية يا عطشان
اكتر م الشيشة والدخان
يا صايم حتى الليل
جميل جميل جميل
حبك خطفني خطف
خلاني الف لف
واضرب بكف كف
على اللي فات والويل
جميل جميل جميل
حبك خلاني اعيش واموت
الصبح اعيش بالليل اموت
لحد سواد الليل ما يفوت
اشوفك صبح يحيي الليل
جميل جميل جميل
بحلم معاكي اعيش واكمل
الحب منك اخد واحمل
والصبح معاكي مهما طول
اشوفك برضة طول الليل
جميل جميل جميل
يا حبيبتي ياللي فيكي بادوب
في الكون مفيش زيك محبوب

ما يكفيكيش عشر قلوب
دة حبي ليكي عريض طويل
جميل جميل جميل

كلام في النقد ولو عايز حلول ...عندي

أولا ياللي بتقرا لو انت ساكن في الهرم حتعرف و لو انت مش...مش مشكلة تخيل يا سيدي البشرى الحلوه دي : مشكلة زحمة الطالبيه اللي هي في وسط شارع الهرم اتحلليييت...هيييي , و حرصا على الحفاظ على زحمة شارع الهرم , قررت ادارة المرور -ربنا يخليها- أن تنقل مركز الزحمه الى المنطقه اللي فيها المحافظه-ربناا يحمييهاا-.........
تعالوا بقى نشوف اية سر ازمة الطالبية -المحلولة-..اولا: نظرا لانها منطقة شبة شعبية- دة ان لم تكن هي اصل الشعبية- ففيها ناس كتيييييير اوي بيخرجو من شارع الطالبية وعلشان ما ينزلوش ويطلعوش سلم النفق المتعب اختارو طريقة اسهل انهم ينطو من على اللامؤاخذة (الخوازيق)اللي حاطاها الحكومة في وسط الشارع علشان ما يعدوش من هنا .....وثانيا: السادة الطيارين اللي بيهبطو بميكروباصاتهم الخاصة على الطالبية علشان (يحملوا)ويقفوا حارة تانية وتالتة ؛ والناس بتوع اولا طبعا بيعدو.. فالعربيات اللي ماشية يا ولداة في شارع الهرم تولع ولا تتحرق يا اما تستنى اللي يعدي واللي يحمل ولا اللي بيعدوا بيخلصوا ولا اللي بيحملو بيخلصوا برضة.......
المهم يا سيادنا المشكلة دي خلصت مش عارف ازاي......المهم في اللي جاي

..
لفة بعد المحافظة بشوية , ولفة في وش المحافظة.. وحفاظا على السيولة المرورية قفلو لفة المحافظة - دة ايام مشكلة الطالبية -لاكن بقى لما اتحلت فتحوا اللفة مؤقتا عشان توقف الشارع شويه لحين البحث عن مقر اخر للزحام..........
حل المشاكل دي بقى سهل جدا جدا
اولا :في مشكلة الطالبيه المفروض يحطوا سلم متحرك عالاقل للي طالع لانه صعب جدا خصوصا على كبار السن انهم يطلعوا كل ده .....و دي حاجه سهاه جدا
دا للساده المشاه , أما للساده الطيارين ممكن وضع أمين شرطه- و ركز على أمين دي لأنها حكايه لوحدها-عند الطالبيه يمنع الوقوف صف تاني وكمان أمين عند كل لفه في شارع الهرم عشان يمنع-أو يغرم-الميكروباصات اللي بتلف قبل ماتوصل الجيزه (اخر خطهم) و دي مشكله تانيه بس خليها لوقتها
....و بكده أعتقد ان المشكله اللي بتخلي كل سكان الهرم ياخدوا جزا في الشغل على التأخير ممكن تتحل والله المستعان....

حوت الارهاب

مش كل حد قتل و اجرم,,,,يتقال عليه يطل معظم
يا عم مالك بالناس ودينهم ,,,, الله يسيبهم وانت تقاتلهم
بن لادن و ظواهرى يتكتك,,,, واسلامبولى .. لا اوعى وشك
والزرقاوى كمان بيحنتك ,,,, أهو مره كاش ومره يشكك
ماهو كله على دماغنا يا حوت ,,,, تيجى الناس فى بلدنا تموت
يا حوت الارهاب ارحمنا ,,,, سيبك منه وشوف بقى حالنا
ان كان كده قصدك اصلاح ,,,,سيب الزاير ييجى يرتاح
دى مجيته دى هيه اللعبه ,,,,وكمان بيجيب عمله صعبه
لعبة تسويق ..أو اعلان ,,,, عن مصر وعن دينها كمان

بتزود دخل الشبان ,,,, وتوفر اكل و اسكان
سيبوا بلدنا دى بقى فى حالها ,,,, لا ريس ولا حد نافعها
الا سياحة راجل حر ,,,, لما يحس سلام فى مصر

يا اما دش يا اما حشيش

مالك بتمشي معايا و ماعيش,,,, معلش أصلي شارب حشيش
وايه جابك انت للسكة ديا,,,, اهو أحلى ماعد اشكي القضية
قضية ايه ما قولتليش,,,, معلش أصلي شارب حشيش
طب قوللي ايه القضية ديا,,,, والله شكلك مزقوق عليا
لا لا لأة قوللي و ماتخبيش,,,, دة انا حتى زيك بشرب حشيش
طيب خلاص حاقولها و احنا,,,, مقضيينها طاوله وتشييش
هات طاولة يابني و اتنين معسل,,,, و سيبنا نحكي قضية ماعيش
ماعيش دي كلمة سهله وبسيطة,,,, بسمعها أكتر ماشرب حشيش
من أي حد ساعي و موظف,,,, و حتى من كل الدراويش
ماهو أصل حياتنا دي زي,,,, الزهر يا اما دش يا شيش بيش
ان جالك الدش المتين,,,, حتعيش وتمشي صفيح في سمين
أما لو جاك الشيش بيش,,,, حتعيش مهوي و تقول ماعيش
يا اما بقى و دة لو انت زيي,,,, حتروح بسرعه تشرب حشيش
مانا أصلي لما رميت الزهره,,,, طلعتلي باين كده شيش بيش

قصيدة عرب جرب

هب قتلوك يا صدام و انت صــــاحي يوم العـــيــد

.
قبــــل مــاتكــمـل تنـام جـابـوا عيـشـتـك عـالـحديد

.
يـعنـي حبـكـت يـا بـهـايـم تـعـدمـوه مــع الخـروف

.
طـب مــا عـنـدك هـو نـايـم بـقـالـه مـالأيــام ألوف

.
قـال يـا عـم يـللا نـشـنـق قـبـل مـا يـصـحـو العيال

.
مخ جزمة يـا عم هم عرب جرب صدق اللي قــال

.

*********************

.
حـــد كـــان يـقـدر يـمـسـه لـمـا كـان هـو الرئيس

.
كنتوا عايشين تحت حـسه كنتوا ماشيين كالمعيز

.
غيرش بــس الأمـريـكـان حـطـوهـولكو في الحيال

.
روحـتـوا طيرتم رقبته عرب جرب صدق اللي قال

.

*********************

.
لأ يـا عـم انـا مش معاه في اللي عمله في العراق

.
بـس لـولا الأمـريـكـان لـكـان رئـيـس يحـمـل لواء

.
ايـوا بـرضـه مـا هـو لازم كـلـمـتـيـن حـلوين نفاق

.
وكات حتبقى الـحـاشيـة ماشية أشية معدن وحلال

.
ماحنا لسا يا عم برضه عرب جرب صدق اللي قال